ଓଡ଼ିଶାରେ ବାତ୍ୟା ‘ଫନି’ କ୍ଷୟକ୍ଷତିର ସମୀକ୍ଷା କଲେ ମୋଦି, ୱେଲ ପ୍ଲାନିଂ ପାଇଁ ନବୀନଙ୍କୁ ପ୍ରଶଂସାରେ ପୋତି ପକେଇଲେ

ଭୁବନେଶ୍ୱର: ବାତ୍ୟା ‘ଫନି’ର ତାଣ୍ଡବ ଓଡ଼ିଶାକୁ ଗ୍ରାସିବା ପରେ ଏବେ ରାଜ୍ୟବାସୀ ଅସ୍ତବ୍ୟସ୍ତ ହୋଇପଡିଛନ୍ତି । ଏହାର ପ୍ରଭାବରେ ରାଜ୍ୟର ଅନେକ ସ୍ଥାନ ଅଧିକ ମାତ୍ରାରେ କ୍ଷୟକ୍ଷତି ହୋଇଛି । ତେବେ ଏହାର ସମୀକ୍ଷା କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଓଡିଶା ଗସ୍ତରେ ଆସିଛନ୍ତି । ଆକାଶ ମାର୍ଗରୁ ଶ୍ରୀ ମୋଦି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ବୁଲି ଦେଖିବା ସହ ରାଜ୍ୟରେ ଭେରି ମିନିମମ୍ କାଜ୍ୟାଲିଟି ପାଇଁ ରାଜ୍ୟ ସରକାରଙ୍କ ଭରପୁର ପ୍ରଶଂସା କରିଛନ୍ତି ।

ରାଜ୍ୟ ସରକାରଙ୍କ ୱେଲ ପ୍ଲାନିଂ ଓ ସୁପରଭିଜନ୍ ପାଇଁ ସେ ନବୀନ ପଟ୍ଟନାୟକଙ୍କୁ ପ୍ରଶଂସାରେ ପୋତି ପକେଇଛନ୍ତି । ବାତ୍ୟା ଆସିବା ପୂର୍ବରୁ ରାଜ୍ୟ ସରକାର ଓ ତାର ପ୍ରଶାସନିକ ଅଧିକାରୀମାନେ ନିଜ ଦାୟିତ୍ୱ ଭଲ ଭାବେ ସମ୍ପାଦନ କରିବା ସହ ପାଖାପାଖି ୧୦ଲକ୍ଷ ଲୋକଙ୍କୁ ୫ହଜାର ବାତ୍ୟା ଆଶ୍ରୟସ୍ଥଳକୁ ସ୍ତାନାନ୍ତର କରିଥିଲେ । ଫଳରେ ବହୁ ଜୀବନ ସୁରକ୍ଷିତ ରହିପାରିଛି ।

ରିପୋର୍ଟ ଅନୁଯାୟୀ ଏହି ବାତ୍ୟାରେ ପାଖାପାଖି ୩୦ ଜଣ ପ୍ରାଣ ହରାଇଛନ୍ତି । ହେଲେ ପୁରୀ, ଭୁବନେଶ୍ୱର ଓ ଅନ୍ୟ ସ୍ଥାନମାନଙ୍କରେ ‘ଫନି’ ବିଭୀଷିକା ଦେଖିବାକୁ ମିଳିଛି । ଯାହା ଫଳରେ ବହୁ ସମ୍ପତ୍ତି ନଷ୍ଟ ହୋଇଛି । ଶତାଧିକ ଗଛ ଭାଙ୍ଗିଯିବା ସହ ବିଦ୍ୟୁତ୍ ଖୁଣ୍ଟ ଉପୁଡି ପଡିଛି । ବହୁ ସ୍ଥାନରେ ଏବେବି ବିଦ୍ୟୁତ୍ ସଂଯୋଗ ହୋଇପାରିନାହିଁ । ଲୋକେ ଗରମରେ ଛଟପଟ ହେଉଥିବା ଦେଖାଦେଇଛି ।

ତେଣୁ ଖୁବ୍ ଶୀଘ୍ର ଏହି ସବୁ ସ୍ଥାନଗୁଡିକରେ ସବୁ ପ୍ରକାରର ସମସ୍ୟାକୁ ମୁକାବିଲା କରିବା ପାଇଁ ଆଜି ପ୍ରଧାନମନ୍ତ୍ରୀ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଛନ୍ତି । ରାଜ୍ୟକୁ ପୁର୍ବରୁ କେନ୍ଦ୍ର ପକ୍ଷରୁ ୩୮୦ କୋଟି ଟଙ୍କା ସାହାଯ୍ୟ ରାଶି ମିଳିଥିବା ବେଳେ ବାତ୍ୟା କ୍ଷୟକ୍ଷତିକୁ ପୂର୍ଣ୍ଣଅବସ୍ଥାକୁ ଆଣିବା ପାଇଁ କେନ୍ଦ୍ର ଆହୁରୀ ଅଧିକ ୧ହଜାର କୋଟି ଟଙ୍କା ରାଜ୍ୟକୁ ଦେଇଥିବା ସୂଚନା ମିଳିଛି ।

ରାଜ୍ୟପାଳ ଗଣେଶୀ ଲାଲ, ମୁଖ୍ୟ ଶାସନ ଶଚିବ ଆଦିତ୍ୟ ପ୍ରସାଦ ପାଢ଼ୀ, ପୁଲିସ ମୁଖ୍ୟ ଡାକ୍ତର ରାଜେନ୍ଦ୍ର ପ୍ରସାଦ ଶର୍ମା, କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନ ଓ ଅନ୍ୟ ନେତାମାନେ ବିମାନ ବନ୍ଦରରେ ଉପସ୍ଥିତ ରହି ମୋଦିଙ୍କୁ ସାକ୍ଷାତ କରିଥିଲେ ।