କିନ୍ନର ମୀରା ପରିଡ଼ାଙ୍କୁ ଉଦେଶ୍ୟମୂଳକ ଭାବେ ହତ୍ୟା ଉଦ୍ୟମ ଅଭିଯୋଗ, ଅଳ୍ପକେ ବର୍ତ୍ତିଲେ ମୀରା

ଭୁବନେଶ୍ୱର: ରାଜନୈତିକ ଶତ୍ରୁତାକୁ କେନ୍ଦ୍ର କରି କିନ୍ନର ମୀରା ପରିଡ଼ାଙ୍କୁ ଉଦେଶ୍ୟମୂଳକ ଭାବେ ହତ୍ୟା ଉଦ୍ୟମ କରାଯାଇଥିବା ସେ ଅଭିଯୋଗ ଆଣିଛନ୍ତି । କିନ୍ନର ମୀରା ଆଜି କୌଣସି ଏକ କାମରେ ଭୁବନେଶ୍ୱରରୁ ବେଗୁନିଆ ଯାଉଥିବା ବେଳେ ତାଙ୍କ ଗାଡ଼ିକୁ ଏକ ଟ୍ରକ୍ (ଏପି-୦୭ଟିଜି-୫୧୭୫) ପିଛା କରିଥିଲା । ଟ୍ରକ୍ ଟି ତାଙ୍କ ଗାଡିକୁ ଗୋଡାଇ ଗୋଡାଇ ବାଟ ଭୁଆଶୁଣୀ ମନ୍ଦିର ପାଖରେ ଧକ୍କା ଦେଇଥିବା ସେ ଅଭିଯୋଗରେ ଉଲ୍ଲେଖ କରିଛନ୍ତି । ଖାଲି ଏତିକି ନୁହେଁ ଟ୍ରକ୍ ଧକ୍କାରେ ତାଙ୍କ ଗାଡ଼ି ବହୁ ଅଂଶରେ କ୍ଷତିଗ୍ରସ୍ତ ହୋଇଥିବା ସେ କହିଛନ୍ତି । ଯେଉଁଥିରେ ଅଳ୍ପକେ ବର୍ତ୍ତିଯାଇଛନ୍ତି ମୀରା ।

ମୀରା କହିଛନ୍ତି ଯେ, ଗତ କିଛି ମାସ ହେଲା ରାଜନୈତିକ କାମ ଓ ଅନ୍ୟ ସମାଜସେବା କାମରେ ସେ ବେଗୁନିଆ ଯାଉଥିଲେ । ତେଣୁ କେହି ପ୍ରଭାବଶାଳୀ ବ୍ୟକ୍ତି ତାଙ୍କୁ ସବୁଦିନ ପାଇଁ ରାସ୍ତାରୁ ସଫା କରିଦେବା ପାଇଁ ଏମିତି ଉଦେଶ୍ୟମୂଳକ ଯୋଜନା ରଚିଥିବା ସେ ପ୍ରକାଶ କରିଛନ୍ତି । ଏହା ପଛରେ ବେଗୁନିଆ କିମ୍ବା ଭୁବନେଶ୍ୱରର ରାଜନୈତିକ ବ୍ୟକ୍ତି ବିଶେଷଙ୍କ ହାତ ରହିଥିବା ସେ ସନ୍ଦେହ କରୁଛନ୍ତି । ତେଣୁ ଘଟଣାର ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେ ଜାଆଁଳା ଫାଣ୍ଡିରେ ଏକ ଏତଲା ଦାୟାର କରିଥିବା ଜଣାଇଛନ୍ତି ।